२४ सै घण्टा नेपाली गीतहरू सुन्नुहोस ।

के हो भिटामिन पी, शरीरका लागि किन चाहिन्छ ; के मा पाइन्छ ?

हाम्रो शरीरलाई स्वस्थ राख्न भिटामिन र मिनरल्सको आवश्यकता पर्छ । हामीले खानामार्फत यी तत्त्व पाउँछौँ । भिन्न प्रकारका भिटामिनले शरीरमा बेग्ला बेग्लै तरिकाले काम गर्छ र रोगबाट जोगाउन महत्त्वपूर्ण भूमिका खेल्छ । भिटामिन ए, बी, सी, डीलगायतका पौष्टिक तत्त्व हामीलाई हरेक दिन चाहिन्छ । अहिलेसम्म तपाईंले यी प्रमुख भिटामिनको नाम सुन्नुभएको त छ तर भिटामिन पी बारे पनि सुन्नुभएको थियो त ? सायद धेरै जनाले सुन्नु भएको छैन होला । आज तपाईंलाई भिटामिन पी के हो र यसले हाम्रो शरीरलाई कसरी फाइदा पुर्‍याउँछ भन्नेबारे जानकारी दिँदै छौँ । यसका साथै भिटामिन पी कस्ता खानेकुरामा पाइन्छ भनेर पनि बताउनेछौँ ।

हेल्थलाइनको रिपोर्ट अनुसार प्लान्ट कम्पाउन्ड्सका फ्लेवोनोइडलाई नै भिटामिन पी भनिन्छ । वास्तवमा यी भिटामिन होइनन् । यी एन्टिअक्सिडेन्ट र एन्टिइन्फ्लेमेटरी गुण भएका फाइटोन्युट्रिएन्ट्सको एउटा वर्ग हुन् । यी सबै हाम्रा स्वास्थ्यका लागि निकै फाइदाजनक छन् । फलफूल, सागसब्जी, चिया, कोको र वाइनमा विभिन्न प्रकारका फ्लेवोनोइड पाइन्छन् । फ्लेवोनोइड्लाई बायोफ्लेवोनोइड्सको रूपमा पनि चिनिन्छ ।

सन् १९३० मा वैज्ञानिकले पहिलो पटक सुन्तलाबाट फ्लेवोनोइड्सलाई निकालेका थिए । त्यति बेला यसलाई एक नयाँ प्रकारको भिटामिन मानियो । त्यसैले यसलाई भिटामिन पी नाम दिइयो । अब यो नामको प्रयोग गरिँदैन किनभने फ्लेवोनोइड भिटामिन होइन । फ्लेवोनोइड्स बोटबिरुवामा पाइन्छन् ।

स्वास्थ्यलाई फाइदा

फ्लेवोनोइडले विभिन्न प्रकारका स्वास्थ्य लाभ प्रदान गर्छ भन्ने गरिन्छ । यसले मुटुरोग, मधुमेह र अन्य रोगलाई रोक्न मद्दत गर्छ । फ्लेवोनोइड्सले एन्टिअक्सिडेन्टको रूपमा काम गर्छ । यसले शरीरको फ्री रेडिकल्सको असरलाई कम गर्न मद्दत गर्छ । यी फ्री रेडिकल्सले तन्तुलाई खराब बनाउन सक्छ र यसले थुप्रै गम्भीर रोग निम्तिन सक्छ । थुप्रै अनुसन्धानमा के पाइएको छ भने फ्लेवोनोइड्सले हाम्रो मस्तिष्कको कोशिकाको रक्षा गर्न सक्छ र मस्तिष्कको स्वास्थ्यलाई वृद्धि गर्न सक्छ । फ्लेवोनोइड्सयुक्त खाना खाँदा टाइप टु मधुमेहको खतरालाई कम गर्न सक्छ । प्रतिदिन ३०० मिलिग्राम फ्लेवोनोइड खाँदा मधुमेहको खतरालाई पाँच प्रतिशतसम्म कम गर्न सकिन्छ ।

You might also like