प्रधानमन्त्री ओलीद्वारा एनपिएलको ट्रफी सार्वजनिक

काठमाडौँ, १० मंसिर । नेपाल प्रिमियर लिग (एनपिएल)को ट्रफी सार्वजनिक गरिएको छ । प्रधानमन्त्री केपी शर्मा ओलीले मंसिर १५ गतेदेखि पुस ६ गतेसम्म आयोजना हुन लागेको एनपिएलको ट्रफी सार्वजनिक गर्नुभएको हो ।

काठमाडौँको सुन्धारास्थित धरहरा परिसरमा एक समारोहकाबीच ट्रफी सार्वजनिक गरिएको हो ।

कार्यक्रममा नेपाल क्रिकेट संघ क्यानका सचिव पारस खड्काले नेपाली खेलकुदलाई नयाँ अध्यायमा लैजानका लागि सरकारले गरिरहेको सहयोगको लागि धन्यवाद दिनुभयो ।

सिद्धार्थ बैंक एनपिएलको ट्रफी आफैँमा विशेष रहेको बताउँदै प्रतियोगिताले अन्तर्राष्ट्रिय स्तरमा पनि चर्चा पाउने बताउनुभयो ।

ट्रफीमा सर्वोच्च शिखर सगरमाथाको काख कालापत्थरबाट ल्याएको ढुंगा प्रयोग गरिएको छ । यसमा निकुञ्ज, वन, जंगलको पनि समिश्रण रहेको छ । उक्त पत्थर पर्वतारोही निमा शेर्पा र मिङ्मा तेन्जी शेर्पाले ल्याउनुभएको थियो ।

ट्रफी सार्वजनिक समारोहलाई सम्बोधन गर्दै प्रधानमन्त्री ओलीले आजको दिन नेपाली खेलकुद क्षेत्रका लागि विशेष महत्त्वको दिन रहेको बताउनुभयो । ऐतिहासिक र गौरवपूर्ण धरहराको काखमा नेपाल प्रिमियर लिगको ट्रफी अनावरण गर्दा खेलकुदमा नयाँ जाँगर भरेको पनि बताउनुभयो ।

उहाँले नेपाली क्रिकेट इतिहासको विशाल एवम् उमंगमय पर्व एनपिएल भएको पनि बताउनुभयो । ‘अहिलेको पुस्ताले नेपाली खेलाडीहरुको मेहनत र सफलतालाई अंगालेका छन् । क्रिकेट नेपाली युवा पुस्ताको सपना र गौरवको रुपमा रहेको छ । यो खेलमात्रै नभएर अनुशासनको मानक पनि हो,’ उहाँले भन्नुभयो । त्यस्तै, आयरल्याण्डका खेलाडीलाई आशिफ शेखले रन आउट नगरेर स्पोर्टस म्यानसिपको उत्कृष्ट नमुनाको भिडिओका बारेमा चर्चा गर्नुभयो ।

यसैगरी करण केसीको भ्यालेन्टाइन ब्वाइ नामको बारेमा पनि चर्चा गर्नुभयो । यसैगरी कुशल भुर्तेल बलर कि ब्याटर भनेर प्रश्न गर्दै शतक प्रहार गर्न आग्रह गर्नुभयो ।

चितवन राइनोजका विषयमा ओलीले चितवन गैँडाज भनेर सम्बोधन गर्नुभयो । चितवन गैँडाजका कुशल मल्लको पनि आगामी दिनमा थप चर्चा हुने विश्वास गर्नुभयो ।

लुम्बिनीका कप्तान रोहित पौडेलको नाम सुन्दा नै आफूलाई गर्व लाग्ने बताउनुभयो । उहाँलाई जसले जिते पनि देशले जितेको महसुस हुने बताउनुभयो ।

विराटनगरका कप्तान सन्दीप लामिछानेलाई नेपाली क्रिकेटको ब्राण्ड एम्बेसडर भन्दै नेपालीले चान्स पायो कि डान्स गर्छ भन्दै प्रशंसा गर्नुभयो ।

कर्णाली याक्सका सोमपाल कामीको योर्करबारे पनि चर्चा गर्दै सफलताको शुभकामना दिनुभयो । यसैगरी कर्णाली याक्सले भारतका गब्बर (शिखर) धवनको आगमनले झनै उमंग थपेको बताउनुभयो ।

सुदूरपश्चिमका दीपेन्द्रसिंहको बारेमा प्रशंसा गर्दै उहाँका कीर्तिमानहरुबारेमा चर्चा गर्नुभयो । देशको प्रधानमन्त्री भएकाले आठवटै टिमको समर्थन र सद्भाव रहने बताउनुभयो ।

पहिला सबैलाई शुभकामना दिने तर जितेपछि बधाई दिन्छु । यसैगरी क्यानलाई महिला फ्रेन्चाइज क्रिकेट पनि आयोजना गर्नका लागि आग्रह गर्नुभयो ।

कार्यक्रममा युवा तथा खेलकुदमन्त्री तेजुलाल चौधरीले देश विदेशमा एनपिएलको चर्चा र परिचर्चा भएको प्रति खुसी व्यक्त गर्नुभयो । एनपिएल अब आर्थिक, खेल पर्यटनको उद्योगको रुपमा अघि बढ्ने विश्वास व्यक्त गर्दै सहयोग हुने प्रतिवद्धता व्यक्त गर्नुभयो ।

राखेपका सदस्यसचिव टंकलाल घिसिङले पुराना मान्यतालाई भत्काएर नयाँ मान्यता स्थापित गर्नका लागि एनपिएल सफल हुनेमा विश्वास व्यक्त गर्नुभयो। प्रतियोगिताका लागि राखेपले सदा साथ दिने पनि प्रतिवद्धता जनाउनुभयो ।

एनपिएलमा ८ टिमले सहभागिता जनाएका छन् । समरोहमा प्रधानमन्त्री ओलीका साथै, युवा तथा खेलकुदमन्त्री चौधरी, राखेप सदस्य सचिव घिसिङ, क्यानका अध्यक्ष चतुरबहादुर चन्दलगायत खेल पदाधिकारी र खेलाडीहरुको उपस्थिति थियो ।