कीर्तिपुरमा उत्साहपूर्वक मतदान, उम्मेदवारहरुको आ–आफ्नै दाबी

काठमाडौँ, १६ मंसिर । कीर्तिपुर नगरपालिकाका २० स्थानमा नगरप्रमुख र दुई वडाध्यक्षका लागि उत्साहपूर्वक मतदान जारी छ ।

मतदान जारी रहँदै गर्दा कीर्तिपुर नगरपालिकाका मेयर पदका उम्मेदवार कृष्णमान डंगोलले कीर्तिपुर जनताको अपार मायाले जित्ने दाबी गर्नुभएको छ । उहाँले आफ्नो इमान्दारिता नै देखेर कीर्तिपुरबासीहरुले आफूलाई भोट गरेर जिताउने दाबी गर्नुभयो ।

उहाँले भन्नुभयो, ‘जित्ने आधार मेरो लागि कीर्तिपुर जनताको अपार माया हो । मेरो इमान्दारिता देखेर र जनतामाझ मैले गरेको समाजसेवा नै मेरो जित्ने आधार हो । सानो बेलादेखि हेर्दै आएको कीर्तिपुरबासीहरुको समस्या विस्तारै पूरा हुँदै छ । कीर्तिपुर जनताको लागि विकासहरुको आवश्यक्ता छ त्यो विस्तारै पूरा हुनेछ । म समाज सेवा र विकास गर्दै जानेछ ।’ साथै उहाँले सहजतापूर्ण रुपले मतदान भइरहेको समेत बताउनुभयो ।

नगरप्रमुख र वडा नम्बर १ र ४ का वडाध्यक्षका लागि जारी मतदानमा नगरप्रमुखमा दलीय र स्वतन्त्र गरी २० उम्मेदवार तथा वडा नम्ब् १ मा नौ र वडा नम्बर ४ मा १२ जना उम्मेदवार प्रतिस्पर्धामा छन् ।

नगरप्रमुख राजकुमार नकर्मी, वडा १ का अध्यक्ष हीरालाल महर्जन र वडा नम्बर ४ का अध्यक्ष श्यामराज अधिकारीको निधनपछि उक्त पद रिक्त भएको थियो ।