यो जाडो मौसममा हामी सबैले आफ्नो स्वास्थ्यको धेरै ख्याल गर्नुपर्छ । कम तापक्रमका कारण शरीरमा धेरै अवस्थाले प्रतिकूल प्रभाव पार्न सक्छ। जसका कारण ध्यान नदिँदा बिरामी पनि पर्न सकिन्छ । जाडो मौसममा प्रतिकूल परिस्थितिका कारण शरीरमा केही प्रकारका भिटामिनको कमी हुन सक्ने भएकाले सबैले खानपानमा विशेष ध्यान दिनुपर्ने स्वास्थ्य विज्ञहरू बताउँछन् । जाडो मौसममा भिटामिन डीको कमी धेरै हुने गर्छ ।
विज्ञहरुका अनुसार जाडोमा मानिसहरु धेरै समय घरभित्रै बिताउँछन् र घाम पनि कम हुन्छ । सूर्यको किरणको कम सम्पर्कले भिटामिन–डीको स्तर घट्ने जोखिम बढाउँछ। भिटामिन डी ले क्याल्सियम अवशोषणलाई बढावा दिएर हड्डी, दाँत र मांसपेशीहरू स्वस्थ कायम राख्न भूमिका खेल्छ। यो हाम्रो प्रतिरक्षा प्रणालीको उचित कार्यका लागि पनि महत्त्वपूर्ण हुने गर्दछ। जसले शरीरलाई भाइरस र ब्याक्टेरियाबाट बचाउँछ।
यो मौसममा सबैले आफ्नो आहारमा भिटामिन–डी युक्त चीजहरू समावेश गर्नुपर्छ, ताकि यो पोषक तत्व सजिलैसँग उपलब्ध हुन सकोस्।
एक रिपोर्ट अनुसार, लगभग ४० प्रतिशतमा जाडोमा भिटामिन–डीको कमीका कारण समस्याहरूको बढ्दो जोखिम देखिएको छ। वास्तवमा, यो भिटामिनको दैनिक आवश्यकता पूरा गर्न २०–३० मिनेटको घाम पनि पर्याप्त हुन्छ। तर जाडोमा घामको कमीका कारण भिटामिन डी पर्याप्त मात्रामा उपलब्ध हुँदैन । यस्तो अवस्थामा हामीले खानाबाट प्राप्त गर्ने उपायहरूमा जोड दिनु पर्छ।
यस मौसममा यस्ता धेरै चीजहरू सजिलै उपलब्ध हुन्छन्, जसले भिटामिन–डीको दैनिक आवश्यकता सजिलै पूरा गर्न मद्दत गर्छ।
अण्डा– अण्डा भिटामिन–डीका साथै पौष्टिक खानाको राम्रो स्रोत हो। अण्डामा रहेको अधिकांश प्रोटिन सेतो भागमा पाइन्छ र अधिकांश बोसो, भिटामिन र खनिज पहेंलो भागमा पाइन्छ। एउटा ठूलो अण्डाको पहेँलो भागमा ३७ आइयू भिटामिन डी हुन्छ, जसले तपाईंको दैनिक आवश्यकताको ५ प्रतिशत पूरा गर्न सक्छ।
भिटामिन–डीसँगै अण्डा प्रोटिनको पनि राम्रो स्रोत हो, जसले ऊर्जा मात्र प्रदान गर्दैन, यसमा पाइने अन्य भिटामिनले पनि शरीरलाई स्वस्थ राख्न मद्दत गर्छ ।
च्याउ–शाकाहारीहरूका लागि च्याउलाई भिटामिन–डीको राम्रो स्रोत मानिन्छ। च्याउले भिटामिन– डी टु उत्पादन गर्छ। च्याउमा प्रतिरक्षा मोड्युलेटिंग पोषक तत्वहरू हुन्छन् जुन न्यूरोडिजेनेरेटिभ अवस्थाहरूको लागि लाभदायक हुन सक्छ। च्याउ मुटुको स्वास्थ्य राम्रो बनाउन सहयोगी हुनुका साथै आन्द्राका लागि पनि फाइदाजनक मानिन्छ । जाडोमा च्याउको सेवनले तपाईमा भिटामिन डी को स्तर राम्रो बनाउन मद्दत गर्छ।
डेयरी उत्पादन – शरीरलाई पर्याप्त मात्रामा भिटामिन–डी प्राप्त गर्न सबै प्रकारका दुग्धजन्य पदार्थको सेवन गर्न सकिन्छ । दूध, दही, मक्खनलाई भिटामिन डीको समृद्ध स्रोत मानिन्छ। दुग्धजन्य पदार्थबाट क्याल्सियम सजिलै पाइन्छ जुन हड्डीलाई स्वस्थ राख्नको लागि फाइदाजनक हुन्छ। सबै उमेरका मानिसहरूले आफ्नो आहारमा मध्यम मात्रामा डेयरी उत्पादनहरू समावेश गर्नुपर्छ।
