काठमाडौँ, ३० कात्तिक । नेपाल प्रिमियर लिगका लागि सुदूरपश्चिम रोयल्सले काठमाडौँ म्यारियट होटेलसँग सम्झौता गरेको छ ।
बिहीबार रोयल्सका प्रमुख कार्यकारी अधिकृत प्रकाश खड्का र म्यारियटका सेल्स एण्ड मार्केटिङ विभागका क्लस्टर डाइरेक्टर विपुल कम्बोजले सम्झौतामा हस्ताक्षर गर्नुभएको हो ।
खड्काले म्यारियटसँग सम्झौता गर्न पाउँदा खुसी व्यक्त गर्नुभयो । ’नेपालमा पछिल्लो समय पर्यटनको सम्भावनालाई मध्यजर गर्दै होटलमा लगानी गर्ने वातावरण बन्दै गइरहेको छ । म्यारियटजस्तो विश्वकै अग्रणी संस्थाले नेपाली क्रिकेटको सम्भाव्यतालाई मध्यनजर गर्दै क्रिकेट र नेपालीको नयाँ ब्रान्ड एनपिएलमा गरेको लगानी स्वागतयोग्य छ । फ्रेन्चाइज क्लबहरुमा सबैभन्दा धेरै लोकप्रिय भएको सुदूरश्चिमाञ्चल रोयल्सले म्यारियटसँग सम्झौता गर्न पाउँदा खुसी छौं,’ खड्काले भन्नुभयो ।
कम्बोजले एनपिएलका लागि उत्साहित रहेको बताउनुभयो । ’हामी सुदूरपश्चिम रोयल्सलाई स्वागत गर्न पाउँदा उत्साहित छौँ । टोलीलाई उत्कृष्ट खेलका लागि शुभकामना दिन चाहन्छौं,’ उहाँले भन्नुभयो ।
क्यानको आयोजनामा ८ टोलीको सहभागितामा मंसिर १५ देखि पुस ६ गतेसम्म एनपिएल हुने छ । यसका लागि सुदूरपश्चिमले ४ विदेशी खेलाडी पनि अनुबन्ध गरिसकेको छ । टोलीको मेन्टरमा अष्ट्रेलियाका ब्राड हज र मुख्य प्रशिक्षकमा जगत टमाटा छन् । टोलीको मार्की खेलाडी दीपेन्द्र सिंह ऐरी हुन् ।
