हेटौँडा, ६ मंसिर । नेपाल प्रिमियर लिग (एनपिएल)मा सहभागी जनकपुर बोल्ट्स र हेटौँडा स्कुल अफ म्यानेजमेन्टबीच प्रायोजनसम्बन्धी सम्झौता भएको छ ।
बुधबार म्यानेजमेन्टमै जनकपुर बोल्ट्सका महाप्रबन्धक निरज खतिवडा र हेटौँडा स्कुल अफ म्यानेजमेन्टका प्रिन्सिपल पुरनबहादुर जोशीबीच प्रायोजनसम्बन्धी सम्झौतामा हस्ताक्षर भएको छ ।
हेटौँडा स्कुल अफ म्यानेजमेन्ट जनकपुर बोल्ट्सको शैक्षिक साझेदारको रुपमा रहनेछ । प्रायोजन रकमबारे भने केही खुलाइएको छैन । जनकपुर बोल्ट्सका खेलाडी अनिल साह र शुभ कंशाकारको समेत उपस्थितिमा सम्झौतामा हस्ताक्षर गरिएको हो । अनिल र शुभ दुवैजना म्यानेजमेन्टका पूर्वविद्यार्थी हुन् । यस्तै, म्यानेजमेन्टले अनिल साहलाई आफ्नो ब्राण्ड एम्बेसेडर समेत नियुक्त गरेको छ ।
प्रायोजनसम्बन्धी सम्झौतापछि हेटौँडा स्कुल अफ म्यानेजेमन्टका प्रिन्सिपल पुरनबहादुर जोशीले यसपटक शैक्षिक साझेदारको रुपमा प्रायोजन गरेको म्यानेजमेन्टले आगामी दिनमा टिम नै खरिद गर्ने सम्भावना रहने बताउनुभयो । क्रिकेटको विकासका लागि पूर्वराष्ट्रिय खेलाडी राम नरेश गिरीलाई प्रशिक्षक नियुक्त गरिएको पनि उहाँले बताउनुभयो ।
म्यानेजमेन्टमा दिवा समूहका सबै विद्यार्थीको बाक्लो उपस्थितिमाझ बारा जिल्लाका अनिल साहले आफ्नो व्यावसायिक क्रिकेटको सुरुवात भने मकवानपुरबाटै सुरु भएको बताउनुभयो । उहाँले म्यानेजमेन्ट भन्ने बित्तिकै कडा अनुशासन भन्ने बुझिने उल्लेख गर्नुहुँदै कडा अनुशासनको सिद्धान्तलाई आफूले क्रिकेटमा लागु गरेकै कारण सफलता मिलेको बताउनुभयो ।
आशिफ शेख मार्की प्लेयर भएको जनकपुर बोल्ट्समा नेपाली राष्ट्रिय टिमका पूर्वमुख्यप्रशिक्षक श्रीलंकाली पुबुदु दसानायके रहेका छन् । मंसिर १५ गतेदेखि काठमाडौँमा सुरु हुने एनपिएलमा जनकपुर बोल्ट्समा अमेरिका निवासी हेटौँडा–५ का इन्जिनियर उत्सव सिग्देलले पनि लगानी गर्नुभएको छ ।
