काठमाडौँ, १८ मंसिर । कीर्तिपुर नगरपालिकाका ननिर्वाचित प्रमुख कृष्णमान डंगोलले पद तथा गोपनीयताको शपथ ग्रहण गर्नुभएको छ ।
मंगलबार कीर्तिपुर नगरपालिकाको सभाहलमा कांग्रेसका मेयर डंगोलले पद तथा गोपनीयताको शपथ ग्रहण गर्नुभएको हो ।
शपथ ग्रहणपछि उहाँले आफूले निर्वाचनअघि मत माग्दै गर्दा जनतासामु गरेको प्रतिवद्धताहरु पूरा गर्ने विश्वास दिलाउनुभयो । उहाँले आफ्नो पहिलो निर्णय स्वास्थ्यबाट काम सुरु गर्ने जानकारी दिनुभयो ।
उहाँले भन्नुभयो,‘मैले तपाईहरुसामु भोट माग्दा गरेका प्रतिवद्धताहरु यो दुई वर्षको कार्यकालमा एकछिन पनि आराम नगरिकन, नथाकिकन सकेसम्म पूरा गर्ने विश्वास दिलाउन चाहन्छु । तपाईहरुको विश्वास टुट्न दिने छैन । पहिले आफ्नो पहिलो निर्णय स्वास्थ्यबाट गर्ने छु ।’
मेयर कृष्णमान डंगोल पाँच हजार ३३४ मत प्राप्त गरी विजयी हुनुभएको थियो । सोमबार राति सकिएको मतगणनामा उहाँका निकटतम प्रतिस्पर्धी नेकपा (माओवादी केन्द्र)का शिवशरण महर्जनले चार हजार ५५५ मत प्राप्त गर्नुभएको थियो ।
यस्तै, नेकपा (एमाले)का सुरेन्द्र मानन्धरले चार हजार ३२७ र स्वतन्त्र उम्मेदवार राजमान महर्जन ‘मानव’ले दुई हजार ३६ मत पाउनुभएको थियो ।
