आकांक्षा धामी
काठमाडौँ, ५ माघ । जलविद्युत् आयोजनाका प्रवर्द्धक हुन् अहिलेका ऊर्जा जलस्रोत तथा सिंचाइमन्त्री दीपक खड्का । प्रधानमन्त्री केपी शर्मा ओली नेतृत्वको सरकारमा खड्काले ऊर्जा, जलस्रोत तथा सिंचाइ मन्त्रालयको जिम्मेवारी पाउनुभएको हो । खड्का यसअघि २०७३ सालमा शेरबहादुर देउवा नेतृत्वको सरकारमा खानेपानी तथा सरसफाइ राज्यमन्त्री हुनुहुन्थ्यो ।
पछिल्लो समय नेपाली कांग्रेसबाट मन्त्री बन्नुभएका दीपक खड्का स्वार्थ बाझिने मन्त्रालय सम्हालिरहनुभएको छ । केही महिनायता उहाँ विवादमा समेत परिरहनुभएको छ ।
मन्त्रीको पद सम्हालेदेखि नै उहाँ विवादै विवादको रेखामुनि हुनुहुन्छ । कहिले नेपाल विद्युत् प्राधिकरणका प्रबन्ध निर्देशक कुलमान घिसिङसँगको विवाद त कहिले नेपाल स्काउटको जग्गा प्रकरण विवादमा उहाँको नाम जोडिने गरेको छ ।
केही समय अगाडि विद्युत् प्राधिकरणका निर्देशक घिसिङलाई जसरी पनि हटाउने रणनीतिका रुपमा प्रस्तुत हुनुभएको थियो ।
सिंहदरबारभित्र रहेको मन्त्रिपरिषद्को कार्यालयबाट करिब डेढ सय मिटर पर रहनुभएका ऊर्जामन्त्री खड्का आर्थिक विवादको मामिलामा पनि मुछिने गर्नुभएको छ । खड्का र प्रधानमन्त्री केपी शर्मा ओलीबीचको सन्निकटतामाथि पनि प्रश्न उठ्ने गरेको छ । बिजुलीको ३२ अर्ब रुपैयाँभन्दा बढी महसुल प्रकरणमा खड्का र ओलीलाई काँध थापिरहेको भन्ने चर्चा पनि हुने गरेको छ । सिंहदरबारको अघोषित ‘कुलमान हटाउ अभियान’का कारण ओली र खड्काको सत्ता–घनिष्ठता निकै बलियो मानिने गरेको छ ।
तर, ऊर्जामन्त्री खड्काले केही व्यवसायीसँग मिलेमतो गरी विद्युत् उत्पादन कम्पनी (भियुसिएल)अन्तर्गत रहेका दुई महत्त्वपूर्ण ठुला आयोजनाको सेयर बेच्न सूचना निकालेपछि भने प्रधानमन्त्री ओलीले चासो राख्नुभएको थियो ।
खड्काले पहिले नै आर्थिक सौदाबाजी गरी किमाथांका अरुण (४४५ मेगावाट) र मुगु कर्णाली अर्धजलाशययुक्त्त आयोजना (१९०२ मेगावाट)को ५१ प्रतिशत सेयर बिक्रीको सूचना निकाल्न लगाएका आरोप खेप्नुभएको छ । यो प्रकरणमा प्रधानमन्त्री ओलीले ऊर्जामन्त्री खड्कालाई कार्यकक्षमै बोलाएर सोधीखोजी गरेको सिंहदरबारमा चर्चा हुने गरेको छ ।
पछिल्लो समय भने जलदुल्ला जलविद्युत आयोजना (१०६ मेगावाट)को ठेक्का निश्चित कम्पनीलाई दिलाउनका लागि आवेदन दिएका अन्य कम्पनीलाई ठेक्का दाबी छाड्न कार्यकक्षमै खड्काले चेक बाँडेको सूचना बाहिरिएको थियो ।
करिब १६ अर्ब रुपैयाँ बराबरको निर्माण ठेक्कामा सेटिङ मिलाउन ऊर्जामन्त्री खड्काले प्रतिस्पर्धामा रहेका चार कम्पनीलाई १५ करोड रुपैयाँका दरले चेक बाँडेको खबर फैलिएपछि खड्का स्वयमले पत्रकार सम्मेलन गरेर उक्त समाचार झुठो भएको प्रष्टिकरण दिनुपरेको थियो ।
सोही प्रकरणलाई लिएर ऊर्जामन्त्री खड्कासहित सङ्लग्नहरूविरुद्ध अख्तियार दुरुपयोग अनुसन्धान आयोगमा चेकको फोटोकपीसहित उजुरीसमेत परेको भनेर समाचारहरु आएका थिए ।
यसरी झण्डै पौने ६ खर्ब रुपैयाँ बराबर लागत अनुमानका आयोजनाका विषयमा विवादमा मुछिनुभएका उहाँले चलाखी गर्दै प्राधिकरणका प्रबन्ध निर्देशक कुलमान घिसिङलाई गएको सोमबार (पुस २२ गते) ८ बूँदे स्पष्टीकरण सोध्नुभयो ।
बिजुलीको महसुल उठाउन खोजिरहने कुलमानलाई जसरी पनि हटाएर आफू अनुकूलको प्रमुख ल्याउने व्यापारीहरूको योजनाअनुसार नै ऊर्जामन्त्री खड्काले स्पष्टीकरण सोधेको भनेर कुलमान निकटका व्यवसायीहरुले आरोप समेत लगाउन भ्याए ।
आफैँ जलविद्युत् आयोजनाको लगानीकर्ता भएका कारण पनि खड्कामाथि विभिन्न आशंकाहरु गर्ने गरिन्छ । उहाँ कुलमानसँग बढ्दो तनावका बीच विद्युत् प्राधिकरणमा ऊर्जामन्त्रीको कार्यकक्ष निर्माण गर्न मन्त्रालयका केही कर्मचारी लिएर नेपाल विद्युत् प्राधिकरणको केन्द्रीय कार्यालय रत्नपार्कसमेत पुगेपछि फरक कोणबाट आशंका व्यक्त गर्ने गरिएको छ ।
प्राधिकरण पुगेको विषय घिसिङसँग परामर्शका लागि भनिए पनि त्यसमा सत्यता नभएको अनुमान गर्ने गरिन्छ । ऊर्जामन्त्री प्राधिकरण सञ्चालक समितिका अध्यक्ष हुनुहुन्छ । तर, कार्यकक्ष नै बनाएर ऊर्जामन्त्री प्राधिकरणमा बस्न खोजेको यो इतिहासमै पहिलो पटक हो ।
मन्त्री पद सम्हालिसकेपछिको अर्को ठुलो विवाद हो लैनचौरस्थित स्काउटको जग्गा पनि हो । ऊर्जा, जलस्रोत तथा सिंचाइमन्त्री खड्काको कम्पनी ‘खड्का ल्यान्ड डेभलपमेन्ट प्रालि’ र नेपाल स्काउट बीचको विवाद पछिल्लो बेला उत्कर्षमा नै पुगेको थियो । स्काउटको लैनचौरस्थित तीन रोपनी जग्गा र दुईवटा भवन भाडामा लिएर मन्त्री खड्काको कम्पनीले लामो समयदेखि व्यापार गर्दै आएको थियो ।
खड्काको कम्पनीले उक्त जग्गामा पार्टी प्यालेस सञ्चालन गर्दै आएको थियो भने दुई वटा भवन विभिन्न पसलहरूलाई भाडामा लगाउँदै आएको थियो । यसरी भाडा बापत पैसा उठाए पनि खड्काको कम्पनीले स्काउटलाई पैसा तिर्न अटेर गरेको भन्दै उहाँ विवादमा पर्नुभयो ।
सुरूवातमा तीन रोपनी जग्गामा पार्टी प्यालेस बनाएको भए पनि दुई वर्षपछि खड्काको कम्पनीले नयाँ संरचना थप्दै पाँच रोपनी जग्गा ओगटेको आरोप खेप्यो । अझ सवारी पार्किङका लागि भन्दै थप डेढ रोपनी जग्गा पनि प्रयोग गरेको स्काउट निकटहरु बताउँछन् ।
खड्काको कम्पनीले सम्झौताभन्दा बढी जग्गा प्रयोग गरेपछि विवाद अख्तियार दुरूपयोग अनुसन्धान आयोगसम्म नै पुगेको छ । अख्तियारले बढी जग्गामा बनाएको संरचना भत्काउन आदेश दिएको तर आदेश कार्यान्वयन नभएको बताइन्छ ।
पार्टी प्यालेस बनेको जग्गाको लिज अवधि समाप्त हुने मिति नजिकिएसँगै दुईबीच दरार बढ्दै गएको र सुरूवातमा खड्का ल्यान्ड डेभलपमेन्ट कम्पनीले तीन रोपनी जग्गाको २०७६ सालको साउन मसान्तमा लिज अवधि समाप्त हुन लागेको उल्लेख गर्दै नवीकरण गरिदिन पत्र लेखेको भनेर समाचारहरु बाहिरिएका थिए ।
तर, स्काउटका प्रमुख आयुक्त रविन दाहालले जग्गा भाडा समयावधि बढाउन नसकिने भन्दै खाली गरिदिन पत्राचार गर्नुभएको थियो । स्काउटले जग्गा भाडामा दिने सम्झौता नवीकरण गर्न नमाने पनि खड्काको कम्पनीले अटेरी गरेको आरोप लाग्ने गरेको छ ।
खड्काको कम्पनी आफूसँग भएको करारको अवधि १० वर्ष नभई १५ वर्ष रहेको दाबीसहित काठमाडौँ जिल्ला अदालतमा मुद्दामा गएको थियो । दुई पक्षबीच विवादकै बीच रविन दाहाल नेतृत्वको स्काउटको कार्यसमिति सरकारले विघटन गर्नुपरेको थियो । यसबीच स्काउटसँग १५ वर्षको लागि जग्गा लिजमा लिएको दाबी गरेको खड्काको कम्पनीले मुद्दा जितिसकेको छ ।
यसरी विवादकै बीचमा रहनुभएका मन्त्री खड्काले १०० दिनमा आफूले ९८ प्रतिशत कामको लक्ष्य हासिल गरेको दाबी गरिरहनुभएको छ । उनले ठुला जलविद्युत् परियोजना, प्रसारण तथा वितरण प्रणालीको सुदृढीकरण, निजी क्षेत्रको सहभागिता र दुर्गम क्षेत्रमा विद्युत् विस्तार लगायतका कार्यहरूमा उल्लेखनीय प्रगति हासिल गरेको बताउँदै आउनुभएको छ ।
मन्त्री खड्काले अन्तरदेशीय विद्युत व्यापार र जलस्रोत व्यवस्थापनका लागि द्विपक्षीय तथा बहुपक्षीय सहकार्यलाई तीव्रता दिइएको, बाढी नियन्त्रण, बहुउद्देश्यीय आयोजनाको विकास र सि.चाइ सुविधाको विस्तार लगायतका क्षेत्रमा समेत महत्त्वपूर्ण उपलब्धि हासिल गरेको बताउने गर्नुभएको छ ।
एक वर्षभित्र देशका सबै नागरिकको घरमा विद्युत् पुर्याउने, विद्युतको स्वदेशमा नै अधिकतम खपत गर्ने र बाँकी रहेको बिजुली भारत र बंगलादेशमा बिक्री गर्ने लक्ष्यका साथ काम गरिरहेको उहाँको भनाइ छ ।
मन्त्रिपरिषद्ले ऊर्जा विकास मार्गचित्र–२०८१ संसदबाट पारित गरिसकेकाले उक्त मार्गचित्रको कार्यान्वयनका लागि निजी क्षेत्रसँग सहकार्य गर्ने उहाँले सुनाउनुभयो । निजी क्षेत्रको समस्या सरकारले राम्रोसँग बुझेको बताउनुभएका खड्काले ऊर्जा उत्पादनका क्रममा देखिएका नितीगत समस्या समाधान हुने दाबी समेत गर्ने गर्नुभएको छ ।
उहाँले यसअघि ऊर्जा उत्पादनको जिम्मामात्र निजी क्षेत्रलाई दिएको भए पनि हाल प्रसारण लाईनसमेत निजी क्षेत्रले बनाउन पाउने व्यवस्था गरिएको बताउनुभयो । विद्युतको आन्तरिक खपतलाई सरकारले पहिलो प्राथमिकतामा राखेको उहाँको भनाइ छ ।
२०३५ भित्र ऊर्जा क्षेत्रलाई चलायमान बनाइ २८ हजार ५ सय मेगावाट विद्युत् उत्पादन गर्ने लक्ष्य लिएको बताउनुभएका खड्काले जलविद्युत् क्षेत्रमा कायपलट गर्ने दृढता समेत लिने गर्नुभएको छ ।
०३५ सम्म मुलुकको ऊर्जा क्षेत्रको समग्र विकासका लागि ४६.५ अर्ब अमेरिकी डलर (६२ खर्ब ३१ अर्ब नेपाली रुपैयाँ) बराबरको लगानी गर्ने लक्ष्य राखिएको छ । मन्त्रीपरिषद्बाट मार्गचित्र स्वीकृत कार्यविधि पास भएसँगै रोकिएर बसेका आयोजना धमाधम अगाडि बढाउन बाटो खुलाउन मन्त्री खड्काको भूमिकाको तारिफ समेत हुने गरेको छ ।
उक्त मार्गचित्रमा जलविद्युत् आयोजना, प्रसारण वितरण तथा सबस्टेसनका लागि आवश्यक पर्ने लगानीको विस्तृत विवरणसमेत समेटिएको छ । आगामी १० वर्षमा छिमेकी मुलुक भारतमा १० हजार मेगावाट बिजुली निर्यात गर्ने सम्झौतासमेत भएको र सोबाहेक बंगलादेशलगायत अन्य छिमेकी देशहरुमा सन् २०३५ सम्म पाँच हजार मेगावाट विद्युत् निर्यात गर्ने योजना मार्गचित्रमा उल्लेख भएको मन्त्रालयले जनाएको छ ।
मन्त्री खड्काले आगामी दिनमा जलाशययुक्त आयोजनाहरुलाई प्राथमिकता साथ अगाडि बढाउने र निजी क्षेत्रलाई पनि सोहीअनुसार लगानी गर्न प्रोत्साहन गराउने गरी सरकारले नीति लिएको बताउनुभएको छ ।
-नेपाल न्यूज बैंक
