काठमाडौँ, १० माघ । संकटा एफसीले चर्च ब्वाइज युनाइटेडलाई पराजित गर्दै सभापति कप फुटबलको सेमिफाइनलमा प्रवेश गर्न सफल भएको छ ।
बिहीबार त्रिपुरेश्वरस्थित दशरथ रंगशालामा भएको पहिलो खेलमा काठमाडौँको संकटाले ए डिभिजन लिग च्याम्पियन चर्च ब्वाइजलाई ३–० ले पराजित गर्दै सेमिफाइनलमा प्रवेश गरेको हो ।
संकटाका लागि अबेका रिचर्डले दुई तथा चन्दन दासले एक गोल गरे ।
पहिलो हाफमा एक गोल गरेको संकटाले दोस्रो हाफमा दुई गोल थप्न सफल भयो । संकटाले अब मछिन्द्र क्लब र नेपाल एपिएफ क्लबबीचको विजेतासँग सेमिफाइनल खेल्ने छ । सेमिफाइनल खेल शुक्रबार हुने छ ।
सभापति कपमा ८ टोलीको सहभागिता रहेको छ ।
