अखिल क्रान्तिकारीको नेतृत्व चयनका लागि मतदान जारी

काठमाडौँ, १२ माघ । नेकपा (माओवादी केन्द्र)को भ्रातृ सङ्गठन अखिल क्रान्तिकारीको नेतृत्व चयनका निर्वाचन शनिबार भइरहेको छ । निर्वाचन बिहान ९ देखि सुरु भएको र अपराह्न ४ बजेसम्म हुने निर्वाचन समितिले जनाएको छ ।

निर्वाचनले अखिल क्रान्तिकारीको आगामी नेतृत्वका लागि ३३ पदाधिकारी, ४८ सचिवालय सदस्य र १६२ केन्द्रीय सदस्यसहित २४३ जना चयन गर्ने छ ।

निर्वाचन समितिका अनुसार ३३ पदाधिकारीका लागि १५५ जनाले उम्मेदवारी दिएका छन् । अध्यक्षका लागि पाँच जनाले उम्मेदवारी दिएका छन् । नौ उपाध्यक्ष पदका लागि ४४ जनाले उम्मेदवारी दिएका छन् । यस्तै, एक महासचिवका लागि ८ जनाले उम्मेदवारी दिएका छन् । ९ उपमहासचिवका लागि ३६ जना, १२ सचिवका लागि ५८ जना र एक कोषाध्यक्षका लागि ४ जनाले उम्मेदवारी दिएका छन् ।

अध्यक्षका लागि हेमन्त राई, सुदिन पौडेल, विजयप्रकाश शर्मा सापकोटा, योगेन्द्र बुढा र उपदेश यादव मैदानमा रहेको निर्वाचन समितिले जनाएको छ ।