२४ सै घण्टा नेपाली गीतहरू सुन्नुहोस ।

वर्किङ भिसामा क्यानडा पठादिने भन्दै अनलाइनबाट ३४ लाख बढी ठगी गर्ने दुई जना पक्राउ

सामाजिक सञ्जाल इन्स्टाग्राममा स्टोरी राखी राम्रो तलबको प्रलोभन देखाएर ठगी गरेको आरोपमा दुई जना पक्राउ परेका छन् । काठमाडौं उपत्यका अपराध अनुसन्धान कार्यालयबाट खटिएको प्रहरीको विशेष टोलीले कास्कीका ३० वर्षीय लक्ष्मण नेपाली र सप्तरीका ३५ वर्षीय महावीर प्रसाद साहलाई पक्राउ गरेको हो ।

प्रहरीका अनुसार आरोपित नेपाली र साहले सामाजिक सञ्जाल इन्स्टाग्राममा एउटा स्टोरी राखेका थिए । स्टोरीमा आकर्षक तलब सुविधामा वैदेशिक रोजगारका लागि क्यानडा जान वर्किङ भिसा पाइने भनी नक्कली विज्ञापन राखिएको थियो ।

यस्तो पोस्ट देखेपछि अमन प्रजापति (नाम परिवर्तन) लाई क्यानडा जाने इच्छा जाग्यो । उनले सो आईडीमा कुरा गर्दै जाँदा उनले पीडित मान्धरलाई क्यासियरको काम लगाइ दिने आश्वासन दिए ।

प्रहरीका अनुसार अमनलाई उनीहरूले मासिक पाँच हजार ७०० क्यानडियन डलर (नेपाली पाँच लाख ४५ हजार रुपैयाँ) तलब हुने बताए । त्यसको प्रोसेसिङका लागि अमनलाई ह्वाट्सएपमा च्याट गरेर आएल्ट्स सर्टिफिकेट, सीभी, राहदानी, शैक्षिक योग्यताको प्रमाणपत्रहरू पठाइदिन अनुरोध गरे ।

त्यसलगत्तै उनलाई इन्स्याेरेन्स, सेक्युरेटी डिपोजिट, एलोकेटेड फन्ड, भिजा भेरिफिकेसन रकम तिर्नुपर्छ भनी पीडितलाई नेपालमा रहेका विभिन्न व्यक्तिको नाममा सञ्चालित बैंक खाताहरूमा पटक-पटक गरी जम्मा ३४ लाख ५७ हजार ७१० रुपैयाँ पठाउन लगाए ।

पैसा पठाएर पनि काम नबनेपछि पीडित अमनले ठगी भएको चाल पाए । त्यसपछि उनले काठमाडौं उपत्यका अपराध अनुसन्धान कार्यालयमा उजुरी दिए । .

आरोपित दुवै जनालाई पक्राउ गरी ठगी सम्बन्धी कसूरमा आवश्यक अनुसन्धान एवं कारबाहीका लागि जिल्ला प्रहरी परिसर भक्तपुर पठाइएको प्रहरीले जनाएको छ ।

You might also like