भारतको गुजरातको बडोदरामा रहेको हरनी तालमा डुंगा डुब्दा १२ बालबालिकासहित १४ जनाको मृत्यु भएको छ ।
घटनालगत्तै गुजरातका मुख्यमन्त्री भूपेन्द्र पटेल बिहीबारै घटनास्थलमा पुगेर खोजी तथा उद्धार कार्यको जानकारी लिएका छन् । प्रधानमन्त्री नरेन्द्र मोदीले घटनाप्रति दुःख व्यक्त गर्दै घाइतेको शीघ्र स्वास्थ्यलाभको कामना गरेका छन् ।
मोदीले सामाजिक सञ्जाल एक्समा लेखेका छन्, ‘दु:खको यस घडीमा शोकसन्तप्त परिवारजनमा मेरो समवेदना छ । घाइतेहरुको शीघ्र स्वास्थ्य लाभको कामना गर्दछु । स्थानीय प्रशासनले पीडितलाई सबै सम्भव सहयोग गरिरहेको छ ।’
उनले प्रधानमन्त्री राष्ट्रिय राहत कोषबाट प्रत्येक मृतकका आफन्तलाई दुई लाख रुपैयाँ र घाइतेलाई ५० हजार रुपैयाँ प्रदान गरिने घोषणासमेत गरेका छन् ।
केन्द्रीय गृहमन्त्री अमित शाहले पनि राज्यका मुख्यमन्त्रीसँग कुरा गरेर घटनाबारे जानकारी लिएका छन् ।
कसरी भयो घटना ?
स्थानीय रिपोर्टअनुसार- डुंगा खचाखच भरिएको थियो । यी बालबालिका आफ्ना शिक्षकसँग बिहीबार हरनी ताल पुगेका थिए ।
रिपोर्टका अनुसार- बोटिङ गर्दा बच्चाहरूको सुरक्षाका लागि ‘लाइफ ज्याकेटहरू’ पूर्ण रूपमा लगाइएको थिएन ।
घटनास्थलमा पुगेका गुजरातका विधायक बालकृष्ण शुक्लाले सम्पूर्ण घटनाको जानकारी दिँदै विद्यालयमा अध्ययनरत बालबालिका शिक्षकसँगै आएका थिए ।
घटनास्थलमा रहेका एक अभिभावकले भने, ‘डुंगामा ३० बालबालिका थिए । हामीलाई पहिले सबै कुरा भनिएको थिएन । भर्खरै भनियो कि तपाईंको बच्चा डराएको छ । त्यही भएर हामी यहाँ आएका हौँ ।’
बडोदराका पार्सद शीतल मिस्त्रीले घटनाको जानकारी संकलन गरी डुंगामा १५ जना बालबालिका रहेको थाहा पाएको जनाए ।
शीतल मिस्त्रीलाई डुंगामा लाइफ ज्याकेट छ ? भन्ने प्रश्न सोध्दा उनले भने, ‘यो अनुसन्धानको विषय हो । तर ठेकेदारले लाइफ ज्याकेट उपलब्ध गराएको दाबी गरेका छन् ।
के भन्छन् अमित शाह ?
यस घटनापछि केन्द्रीय गृहमन्त्रीले राज्यका मुख्यमन्त्री भूपेन्द्र पटेलसँग कुरा गरेका छन् ।
उनले सामाजिक सञ्जाल एक्समा लेखेका छन्, ‘बडोदराको हरनीको मोटनाथ तालमा विद्यालयका बालबालिकाको डुंगा डुबेको घटना हृदयविदारक छ । मैले यस सम्बन्धमा मुख्यमन्त्रीसँग कुरा गरेको छु । एनडीआरएफ टोलीहरू राहत र उद्धार कार्यमा संलग्न छन् ।’
‘म यस दुःखद घटनामा ज्यान गुमाएका बालबालिकाका परिवारप्रति समवेदना व्यक्त गर्दछु र घाइते बालबालिकाको शीघ्र स्वास्थ्यलाभको कामना गर्दछु ।’
