जनकपुर, ५ पुस । जनकपुरधाममा बिहानै एक जना पुरुषको शव फेला परेको छ । जनकपुरधामको विद्यापति चोकस्थित दुर्गा मन्दिर परिषरभित्रै एक जना पुरुषको शव फेला परेको छ ।
अन्दाजी ४५, ५० वर्षको पुरुष रहेको तर पहिचान खुल्न नसकेको धनुषा प्रहरीले जनाएको छ । शवको मुखमा कुनै वस्तुले प्रहार गरेको देखिएको छ र छेउमै इँटा पनि फेला परेको धनुषाका एसपी भुवनेश्वर तिवारीले जानकारी दिनुभयो । घटनास्थलमा तालिम प्राप्त कुकुरको टोली परिचालन गरिएको उहाँले बताउनुभयो ।
यता स्थानीयहरुले राति मापसे गरेर केही व्यक्तिले होहल्ला गर्दै गरेको सुनेको बताए । उनीहरुले दिनहुँ मापसे गरेर मन्दिर छेउछेउबाट मान्छेहरु हिँड्डुल गर्ने गरेकोले आफूहरुले वेवास्ता गरेको जानकारी दिए ।
घटनासम्बन्धी अनुसन्धान भइरहेको धनुषा प्रहरीले जनाएको छ ।
