नगरपालिकाका अनुसार ६० वर्षभन्दा माथिका दाँत नभएका ज्येष्ठ नागरिकलाई निःशुल्क कृत्रिम दाँत राखिदिने बताएको छ ।
१४ वटै वडामा स्वास्थ्य शिविर गरेर कृत्रिम दाँत निःशुल्क राखिदिने भन्दै विहीबार नगरपालिकाको प्रमुख प्रशासकीय अधिकृत भोलाप्रसाद चापागाईंले एक सूचना जारी गरेका हुन् ।
नगरपालिकाका जनस्वास्थ्य अधिकृत शम्भुकुमार महतोले नगरपालिकाले पहिले सबै वडाको स्वास्थ्य सेवा केन्द्र मार्फत सेवाग्राहीलाई शिविर मार्फत छनोट गरेर निःशुल्क दाँत हालिदिनेछ ।
‘स्वास्थ्यकर्मीको टोलीले वडाको स्वास्थ्य सेवा केन्द्रबाट सेवाग्राहीलाई कस्तो दाँत चाहिन्छ, राख्न मिल्छ कि मिल्दैन, कतिवटा दाँत चाहिन्छ भनेर संकलन गरेर ल्याउँछन् । नगरपालिकाले सोही अनुसार टेण्डर गरी दाँत राख्न अस्पताल वा स्वास्थ्य संस्था मार्फत दाँत राखिदिन्छ,’ महतोले भने ।
बनेपाका स्थायी बासिन्दालाई प्रवाह हुने यो सेवाको लागि १८ पुसमा एक नम्बर वडाबाट शिविर सुरु भएर ७ मागमा १४ नम्बर वडामा पुगेर सकिनेछ ।
